بسم الله الرحمن الرحيم
وكالمعتاد همسة بتظهر فى الوقت اللى بهرب فيه عشان تجبرنى على المواجهة
كنت قاعدة بسمع الاغنية ديه
همسة : حلو الشريط دا صح وفيه اكتر من وتر حساس ولا ايه
انا : انتى عايزة مني ايه دلوقتى
همسة : عايزة اعرف الحقيقة اللى جواكي
انا : ديه مجرد اغنية عجبتنى
همسة : ليه وجواكي ليها فيديو كليب متركب على صور الماضي
انا : لانى بكره نفسي .. بكر نفسي انى ضعفت قدامه .. بكره نفسي لانى لحد دلوقتى كرامتى مجرووحة
همسة : ما انتى رديتي القلم قلمين وفى شهرين اتخطبت لى لواحد تانى
انا : مش كفايا .. هو معرفش انا سيبته ليه .. ميعرفش انا اصلا سيبته امتى .. فى نظره انا اللى بعته
وانا عايزاه يحس انى مش بايعاه ..لاء انا اللى انتصرت ونصفت كرامتى عليخ
همسة : مش فاهمة ازاى تفرق
انا : تفرق كتير .. انا مش خاينة ولا قليلة الاصل .. انا عايزاه يعرف انى مبعتهوش خيانى مني ليه ولا قليت باصلي وسيبته
لاء انا عايزاه يعرف انه خسرنى .. عايزاه يعرف انى دوقته نفس الكاس اللى دوقهولى لما انفصل عنى برسالة موبيل
عارفة يعنى ايه رسالة موبيل .. يعنى انا حتى فى نظره مستاهلش مكالمة يشرح اسبابه
همسة : وقتها كان وضع تانى انتى عارفة انه كان متأزم نفسيا بسبب شريكه اللى نصب عليه
انا : لا تفرق عندي كتير .. تفرق عندى وانا ببكى واترجاه يشرح لى وانا بنهار قدامه واقوله ادينى فرصة وتعالى نتكلم
قدرت تعبه وحالته وانه لما حب يضحي عشانى ضحى بيا .. اترجيته بدموعى يدينى فرصة والنتيجة ؟؟!!
همسة : ايوا .. بس
انا : النتيجة قالى اشوف يمكن تستاهلى .. بعد كل دا هيشوف ان كنت استاهل .. لااااء دا ايه البرود دا اللى بيغرس بيه سكينته فى قلبي
دا الحيوان بيتدبح بسكينة حامية وخطف عشان يترحم من العذاب والالم
لكن انا عيشت سنة كاملة ببتسم فى وشه وانا ببكى جوايا من الم طعنته
سنة كاملة وجعتنى كل كلمة بحبك قالهالى
بكيت قدامه وهو فاكرنى خايفة يسيبنى تانى .. ميعرفش انى كنت ببكي عشان كلمة بحبك مبقالهاش معنى ولا طعم جوايا
عشان انا سيبته وهو لسة ميعرفش
همسة : طيب اهدي وفهمينى ايه اللى جد
انا : مفيش حاجة جدت النار ديه لسة جوايا .. والمشكلة انى حاولت اسامحه .. كنت على وشك اسامحه
ونبدأ صفحة جديدة نرجع فيها اصحاب بجد .. لكن بكل غباوة غلط وكابر
رفض يعترف انه كان غلطان ولتانى مرة بفشل اواجه بحقيقة غلطه وانى انا اللى ساكتة بمزاجي عشانه .. عشان محرجهوش
همسة : ايه اللى جد بردو الكلام دا عدا عليه فترة طويلة قوى
انا : انا منستش حقي وكرامتى اللى ضاعو .. احنا فعلا علاقتنا كانت صفر من عشرة
ودموعى كانت على حد مياستهلش .. كل ما بسمع الاغنية ديه بفتكر انى لسة ماخدتش حقي
همسة : كل دا ولسة مأخدتيش حقك ؟؟ بالوحدة اللى عايش فيها ماخدتيش حقك ؟؟ لا ارتبطت ولا اتجوز لحد دلوقتى رغم ان عنده
افضل امكانيات الجواز .. عايزة اكتر عشان تعرفى انه بيحس كل يوم انه خسرك
انا : ماهو كان هيخطب يعنى تجاوز الموضوع
همسة : كان هيتجوز امتى يا غبية .. بعد فرحك صح .. بعد ما شافك بتتزفى لحد تانى غيره
انا : كنت قدامه سنتين كاملين قبل ما اتخطب تانى لو كان عايزنى كان نزل من على عرش غروره وكبرياؤه
ومع ذلك احساسه كل يوم انه خسرنى ميكفينيش
على قد الحب اللى حبيتهوله.. انا استاهل انه يتوجع اكتر من كدا زي ما وجعنى
همسة: .. حرام عليكي عايزة ايه اكتر من كدا
انا : نفسي يعرف انا سيبته ليه .. لان ساعتها هيعرف الندم بجد مع كل نفس بيتنفسه
همسة : مش معقول يكون قلبك مليان بكل الغضب دا .. فين البنوتة اللى بتسامح مجرد ما حد بيص لها ويبتسم
ازاى القلب المليان حب ورحمة لكل الناس يقدر يشيل كل الغضب والحقد دا وعلى مين
على حد حبه بجد .. انتى عارفة انه ندمان كفايا عليه احساسه دا
انتى فى اديكي حب طاهر يشفي جروح السنين .. ايديله فرصة يشفى جروحك
انا : الحب الطاهر دا هو هدية ربنا ليا بيعوضنى عن ابويا اللى راح وبيعوضنى عن كل جرح عيشته فى دنيتى
بحبه وبعشق تراب رجليه
بس غصب عنى .. قلب البنوتة المجروحة اللى جوايا مش قادر ينسى ولا يخف
همسة : انسي ومتفكريش وهو هيخف .. سامحي بصدق عشان يخف .. توعديني
انا : اوعدك
