ازمة منتصف العمر .. مبرر اجتماعي ام حقيقة علمية
اعذريه دا بيمر بمراهقة متأخرة .. معلش ماهي ديه ازمة منتصف العمر"
عبارات لا تقال الا فى مناسبة محددة .. كمسكن لجرح امرأة تصابى زوجها وتزوج من امرأة اخرى فى عمر بناته .
فعندما تقع الكارثة ويعلن نبأ زيجة كهذه تبدأ المرأة بالنحيب وذكر كل الاشياء الجيدة ومساندتها لزوجها وتربية والابناء و.. و... وما الى ذلك من تضحيات.
ديه مقدمة مقالة هتقراها فى جريدة او فى مقال عادي .. يلا ناخد الموضوع ببساطة اكتر ونبص له من اكتر من زاوية
ام العيال الزوجة المخدوعة .. عمرها ضاع فى تربية الاولاد والحفاظ على البيت
وقفت جنب جوزها فى اسوء الاوقات واسعدها كانت ست بيت قايدة صوابعها العشرة شمع وفى النهاية الزوج الخاين اتجوز عليها ...
ولو سالتها ازاي وليه يعمل كدا معندهاش غير رد واحد " فراغة عين"
بس انا جاية النهاردة اقولها لاء .. مش فراغة عين
مش هدافع عنه ولا هخلق مبررات .. بس فى مبدأ معروف ان اى نتيجة فى الدنيا بيكون لها اصول ومقدمات
خلينا ناخد القصة من بدايتها .. الولد والبنت
معروف ان التطور الفسيولوجي للبنت بيكون ليه تأثر كبير على سيكولوجيتها
يعنى ايه الكلام الكبير دا
يعنى ان تطور شكل جسم البنت الخارجي والداخي كمان بيكون ليه تأثير فى تكوينها الشخصي والنفسي على عكس الولد
ودا بيخلق فرق بينهم قدروه العلماء بحوالي اربع سنين ويلا نقول ديه رقم واحد
غالبا الزيجات اللتى بتم بيكون الفرق بين الزوجين قليل جداا ان وجد اصلا
يعنى بيكونو زمايل فى الجامعة او الشغل .. فرق العمر بينهم مش كبير
دا غير طبعا الظاهرة اللى انتشرت فجأة لاسباب كتير ومنها التعارف والارتباط العاطفي على الانترنت وهي ان الزوجة بتكون اكبر من الزوج واقل فرق سنتين
طيب وايه المشكلة ... المشكلة ان الزواج مش بس قصة حب او بيت نضيف واكل كويس وتربية اطفال .. فى حاجة اهم وهي العلاقة الزوجية واللى اى خلل فيها بيسبب ضغط عصبي للطرفين ويسبب المشاكل .. لتوضيح اكتر
الرغبة الجنسية عند الرجل بتلازمه مدى الحياة وبيفضل احتياجه الجنسي مستمر طول حياته
بعكس الست .. بتوصل لمرحلة سنية معينة وتبدأ الرغبة تقل جواها وبالوصول لمرحلة انقطاع الطمث واللى بيطلقو عليه سن اليأس الرغبة الجنسية عندها تقريبا بتموت وتعالو نقول ديه نقطة رقم اتنين
لو جمعناهم هنلاقي ان فى عمر من 30 ل 45 بيكون الرجل فى اهم مراحل رجولته ولو قولناها بالمعنى الدارج قوى ( زروة رجولته ) بتكون الست فى مرحلة تمهيد لسن اليأس وهو اللى قولنا بتهدأ فيه الرغبة الجنسية الى ان تنطفئ
وطبعا بتكون النتيجة اسوء لو الزوجة هي الاكبر
دا بيسبب وجود فجوة بين الزوج وزوجته .. لانها جت فى نص الطريق ووقفت .. بقت العلاقة الجنسية بينهم مجرد لقاء روتينى حيوي وفى الغالب بيكون لقاء مجهد وغير محبب للزوجة
اكيد مفيش زوج هيحب ينشئ علاقة لمجرد الروتين وكمان بيحس ان زوجته متضرره وبتعمل كدا بس عشان ترضيه .. ودا فى حد ذاته مش بيوصله لدرجة الرضا
"انا فى عز رجولتى ومراتى راحت عليها "
ديه جملة اى راجل بعيش بالشكل دا بيقولها ومراته راحت عليها مش بس عشان الكلام اللى قولناه دا
لاء فى نقطة رقم 3
وهي عدم اهتمام الست بنفسها .. بتسيب نفسها وتغرق فى شغلها والبيت والاولاد وتنسى انها فى الاصل انثى وان فى زوج محتاج يحس بؤنوثتها
كام ست بتهتم انها تروح للكوافير تهتم باظافرها او شعرها تغير لونه او شكله
كام ست مهتمة بجاملها وانقتها
طبعا الاجابة :: قليل جداا::
لانها خلقت لنفسها دوامه الشغل الصبح وبعد الضهر البيت والطبيخ والغسيل والتنضيف تخلص ولو فاض وقت تبص بصة على اولادها لو محتاجين مساعدة فى المذاكرة ويستحسن لو مش محتاجين عشان معندهاش لسة خلق
وتدخل على السرير تنااااااااام من الاجهاد عشان تبدأ يوم مكرر .. هتعمل فيه كل الى عملته فى اليوم اللى قبله
طيب فين الزوج من دا كله .. ماهو بيكون راجع تعبان .. محتاج يلاقي زوجة تسمعه وتتكلم معاه تهتم بيه .. تهتم بتفاصيل اهملتها من بعد اول سنة جواز
للاسف الست المصرية فاقدة لروح الابتكار .. مبتعرفش تبتكر روح جديدة
تغير ولو بسيط فى تفاصيل حياتهم وبيتهم
محتاج يلاقي زوجة من وقت للتانى بتجدد رومانسيتهم
مثلا احتفال بسيط ليها ولزوجة بمناسبة عيد زواجهم او عيد ميلاده
حتى لو مفيش مناسبة .. تخلق عشا بسيط بس ليهم هما بس
فى الف طريقة ممكن ان الست تخلق شئ جديد او تجدد شئ انطفي فى زحمة الحياه
فى الف طريقة تقدر الست تنمي هرمون العشق عند الرجل بدل من هرمون الحب
ياترى ايه بقة اللغز الجديد لهرمون الحب وهرمون العشق
الهرمونات ديه قريت عنها فى مقال لدكتورة عربية فى دبي
وقالت ان المخ بيدي تنبيه عاطفي ينتج عنه افراز اما هرمون الحب او هرمون العشق .. بس رجعو قالو ان كلام الدكتورة دا ضعيف
طيب ناخد الكلام القوي من دكتور محمد الرفاعي اللى كتبه فى مقاله عن احدث الدراسات فى ايطاليا عن بروتين الحب
فى جزئ بروتين فى المخ لما بيكون الانسان فى حالة الحب .. نسبة البروتين دا بيعلى ويستمر تأثيره لمدة عام كامل بعد كدا بيقل بالتدريج لحد ما يرجع لمعدلاته الطبيعية .. ولذلك دايما الازواج او الثانئيات بيقولو ان اول سنة حب بتكون اجمل او اقوي سنة .. طيب وبعدين التجديد العاطفي هو اللى بينبه المخ لحالة حب جديدة فيزيد البروتين من تانى وزي ما قولنا ان الست المصرية فاقدة لروح الابتكار والتجديد وبالتالى مفيش اى تحفيز للمخ ان البروتين دا يزيد وديه رقم 4
تعالو نجمع ال 4 نقط مع بعض .. هنلاقي ان الراجل غضب عنه بيروح يدور على شابة صغيرة .. هي كمان فى ريعان شبابها هتقدر تلبي احتياجاته النفسية والجنسية والعاطفية بشبابها لفترة اطول من اللى عاشتها معاه ام العيال
والزوج بيضطر انه يخبي ويتجوز فى السر لان مفيش روح المناقشة بينهم اصلا
ولو حاول يفهمها مش هتفهم غير انها ضحت و... و... وفى الاخر جي هو عايز يتجوز
لكن دا مش مبرر للاخفاء وديه الغلطة اللى بيقع فيها الزوج ويخليها تحطه فى الموقف دا
طالما هو بيستخدم حقه الشرعي يبقى مفيش حاجة مشينة او مخجلة يضطر يخبيها
وبدل ما الزوجة تبص لحياتهم اللى هي دمرتها بشكل عملي او ايجابي
لاء بتكابر وبتزود المشكلة وبتهدم الاطلال المتبقية فى حياتها مع زوجها
كل الكلام دا ببساطة وجهة نظري الشخصية .. اهلا بالاتفاق او الاختلاف
والسلام خير ختام
