بسم الله الرحمن الرحيم
دخلت اوضتى عمالة اغنيى لقيت صديقتى همسة ليل قاعدة مستنيانى وبدأ بينا الحوار
كالعادة جاية تسمع مني اللى بينى السطور واللى مش بقدر اقولو لحد غيرها
همسة ليل :ها مش عايزة تقوليلى حاجة
انا: ما انتى جاية عشان احكي لك كل حاجة
همسة ليل: انا سامعاكى
انا: مش عارفة فى اى شارع من شوراع اسكندرية بمشي فيه .. بحس انى فى دنيا غير الدنيا
حتى وانا راكبة الترام الازرق ابو دورين ..كالعادة كنت بسمع اغانى فى ال
mp3
وسرحانة فى الشوارع والناس اللى بتجرى تهرب من المطر وتستخبى
وفى طريقى دخلت شارع جانبى .. كان فيه شجر .. مش عارفة صدفة ولا قدر ان تشتغل اغنية كاظم ماشي بشارع
ماشي بشارع هادى خالى من البشر
بس انا وحدى والمظلة والمطر
فى حضنى الحقيبة والدفاتر والصور
الشمس غابت وريح تلعب فى الشجر
الاغنية موسيقتها فالس (تانجو) وصوت كاظم دافى وعميق اخدنى معاه وسرحت لابعد حدود
وهو بيقول وسمعت صوت خطوة تجرى تجرى باتجاهى
بصيت ورايا لقيته .. ايوة هو .. لقيته بيقرب منى ووقف وبص فى عنيا
واخد ايدى ورقصنا على الاغنية سوا
والمطر نازل حوالينا مع اضواء العربيات والمحلات كأنه ستارة اضواء حوالينا
نسينا اننا فى الشارع
ونسينا ان فى ناس حوالينا
هو بيبص فى عنيا .. وانا حاسة بدفى ايده فى ايديا ورشاقة خطواته واحنا بنرقص
الناس من رصيف للتانى واقفين يشوفو العشاق اللى بيرقصو تحت المطر
مبسوطين وبيهمسو ما بين
شايفة لايقين لبعض ازاى ...ياترى فى اسعد منهم دلوقتى .. ياترى حاسين بايه وهما مع بعض كدا
وخلصت الاغنية وصوت التسقيف ملي سكون الشوارع
ضحكنا من الكسوف وطلعنا نجرى .. مش عارفة.. كنا بنجرى نجرى تحت المطر
وفجأة سكت المطر وعليت اصوات العربيات حواليا والناس رجعت لحركتهم الطبيعية فى الشارع
وانا واقفة لوحدى على رصيف
حاسة زي ماتكون لحظة خطفتنى لمكان تانى وزمن تانى
ولقيت سواق بينادى على الركاب .. وبمنتهى قلة الحيلة روحت ناحيته
كلمنى .. جاية يا ابلة .. اتفضلى جنب المدام هنا
مسلوبة الارادة ركبت واتقلبت المشاعر جوايا من حال لحال
فضلت باصة على الطريق اللى بيجرى جنبى وبيبعدنى
بس بيبعدنى عن ايه .. مش عارفة ..ولما دخلت البيت كان نفسي اجرى بسرعة على اوضتى
اللى بردها اشد من برد الشارع اللى مدفيه المطر
والاقى جدتى مستنيانى اترمى فى حضنها
وانام على رجلها
تغطينى بشالها الصوف
وتلعب فى شعرى وتحكى لى حكايات زمان اللى زمن كان غير الزمان والناس غير الناس والمشاعر غير المشاعر
وتسكت لما تحس بدمعتى السخنة نازلة على رجلها
تطبطب عليا وتنهديها بتقولى معلش يا بنتى ما باليد حيلة
وتغني لى بصوت هادى واستسلم للنوم بين ايديها انام وينتهى الليل
ويطلع نهار جديد
همسة ليل : عارفة الطريق اللى بيجرى بيبعدك عن ايه
انا : عن ايه
همسة ليل : بيبعدك عنك .. عن احلامك وامنياتك .. عن خيالك بحضن حبيب يدفيكى فى عز برد الليل
بيبعدك عن احساسك بالامان فى حضن جدتك الله يرحمها
مش عارفة اقولك ايه .. بس خلينا نستنى ونتفرج .. يمكن فى يوم يجرى بيكى الطريق عشان يوصلك
يوصلك لحلم مستنياه .. هتلاقى فيه تعويض عن كل الاحلام اللى راحت
عيشى فى العالم اللى مش بايدك عايشة فيه
واستنى لما يجي الوقت وتعيشى فى العالم اللى بايدك هتخلقيه
3 comments:
ما أصعب الأنتظار لما يكون من غير أمل
وما أحلاه لما نحس أنه فآخر الطريق ده نور
بس يكون فيه أمل .. فكل خطوه هنخطوها هنحس بسعادة لأن كل خطوه فاتت معناها أننا قربنا خطوه
دعوه لرب العالمين
بس يكون فيها يقين
وبدام فيه يقين يبقى أكيد فيه أمل
ويخف طول الأنتظار مهما لو كان طويل
مش عارفة اقولك ايه يا احمد
ردك رقيق قوى
ميرسي خالص واتمنى يكون البوست اللى جى يكون على مستوى كل اللى عجبوك
منور يا باشا
مع ان ديه مش اول مره اقراها بس حسيت انه وهمه بيرقصو نفسي اتخطف وبقيت اتنفس براحه كأن انفاسي ممكن تشوش المشهد .. حسيت بجد اني شايفهم وبيدق قلبي مع دقة قلوبهم وهمه بيرقصو ..
ده مش اول تعليق ليه .. بس حسيت لما قريت البوست ده تاني كأني اول مره بقراه .. وكاني بشوف صوره تانيه مشوفتهاش اول مره
Post a Comment